2 patay sa landslide sa Kennon Road (4 pa sugatan)

DALAWA ang patay sa pagguho ng lupa sa Camp 7 sa Wabac, Kennon Road sa Baguio City, dakong 9 a.m. nitong Lunes.

Hindi na umabot nang buhay sa pagamutan si Marjorie Magsino, 33-anyos, taga-Urdaneta, Pangasinan.

Kinilala ang ikalawang biktima na si Teresita De Guzman, 61, binawian ng buhay sa Baguio General Hospital.

Sugatan ang 40-anyos driver ng van na si Ernesto Luis; Ping De Guzman, 42; Henry Eugenio, 46, at si Mary Jane Lobino, 34.

Sa imbestigasyon, paakyat ang tinatahak na kalsada ng van ng mga biktima nang biglang gumuho ang bundok sa kanang bahagi at natabunan ang kanilang sasakyan.

Samantala, isinara ng Department of Public Works and Highways (DPWH) ang 32-kilometrong Kennon Road dahil sa gumuhong lupa.

Minero todas, 4 sugatan sa pagguho ng lupa (Sa Benguet)

BAGUIO CITY – Patay ang isang minero habang sugatan ang apat iba pa nang matabunan ng lupa ang kanilang tinutuluyang bahay sa Ududan, Ampucao, Itogon, Benguet kamakalawa.

Kinilala ni PO3 Marlon Pablito, imbestigador ng Itogon Municipal Police Station, ang namatay na si Joven Robiz Baw-anan, 30-anyos, at tubong Nueva Viscaya.

Samantala, nagpapagaling pa sa Baguio General Hospital and Medical Center si Manuel Balang Diano, 30-anyos, tubong Nueva Viscaya, napinsala ang kanang binti.

Habang nagkaroon lamang ng minor injuries sina Barton Baw-anan, 17; Amos Robiz Baw-anan, 21; at si Glenn Baw-anan Balao, 18-anyos.

Batay sa inisyal na imbestigasyon ng pulisya, nasa loob ng kampo nila ang biktima nang biglang gumuho ang lupa sa taas ng kanilang tinitirhan.

Pinaniniwalaang ang walang humpay na pag-ulan na dulot ng habagat ang sanhi ng landslide.