P.2-M pekeng tsinelas nakompiska sa Navotas

NAKOMPISKA ng mga awtoridad ang mahigit P200,000 halaga ng mga pekeng tsinelas sa isang bodega na pag-aari ng isang Chinese national sa Navotas City kamakalawa ng hapon.

Sa bisang search warrant na ipinalabas ni Judge Celso R.L. Magsino ng Regional Trial Court (RTC) Branch 74 ng Malabon City, pinasok ng mga awtoridad ang bodega na pag-aari ng isang Benson Tan sa 137 Taliba St., Brgy. San Rafael Village, Navotas City dakong 5:30 p.m. at kinompiska ang mga pekeng tsinelas na may tatak na Nike, Lacoste Bipower, Dolep at Havaianas, tinatayang P215,000 ang market value.

Hindi na pumalag si John Michael Tan, manager/custodian ng nasabing warehouse, nang halughugin ng mga awtoridad ang warehouse sa harap nina Brgy. Ex-O Alexander An at mga barangay tanod na sina sina Sebastian Tigbawan, Ryan O Aguinaldo at Junray B. Delicano.

Bukod sa pekeng mga tsinelas, nakompiska rin ang sample books, folders, invoices, receipts, ledgers, journals at logbooks na gamit sa pagbebenta ng nasabing mga epektos.

Kasong paglabag sa Article 2 ng Republic Act 7394 o Consumer Act of the Philippines ang  kinakaharap ng suspek na si Tan dahil sa pag-iimbak ng mga pekeng produkto.

Rommel Sales