Totoy, ate, 1 pa patay sa sunog sa Batangas (1 kritikal, 5 sugatan)

PATAY ang tatlo katao nang matupok ang apat- palapag na gusali sa Brgy. Poblacion sa Lian, Batangas nitong Miyerkoles.

Kinilala ni BFP Region IV-A Director Ireneo Palicpic ang mga biktimang sina Annaliza Hunson, 50; Jewel Grace Batoto, 12; at kapatid niyang si John Clifford, 9. 

Sa inisyal na imbestigasyon, namatay si Hunson nang tumalon mula sa ikatlong palapag ng JJJ Marketing building, habang nakulong ang dalawang bata sa kanilang kuwarto. 

Samantala, kritikal ang kalagayan ng 75-anyos na si Milagros Hunson na tumalon din mula sa gusali. Limang iba pa ang isinugod sa ospital dahil sa mga paso sa katawan. 

Bandang 4 a.m. nang sumiklab ang sunog na umabot sa ikalimang alarma bago naapula dakong 7 a.m.

Inaalam pa ng mga awtoridad ang sanhi ng sunog.