Sekyu nadulas, nahulog mula 7/F nabagok tigok

PATAY ang isang guwardiya nang madulas sa ikapitong palapag, nahulog sa 3rd floor at tumama ang ulo sa pinakakanto ng isang exhaust fan sa isang ginagawang gusali sa Pasay City kahapon ng umaga.

Agad binawian ng buhay sanhi nang pagkabasag ng bungo ang biktimang si Rogelio Rivera, may sapat na gulang, ng Defense Specialist Security Agency, at tubong Centro Sur, Camalinlugan, Cagayan.

Sa imbestigasyon nina SPO1 Dennis Desalisa at SPO1 Rodolfo Soquina, ng Homicide Section ng Pasay City Police, naganap ang insidente dakong 4:45 a.m. sa construction site ng Conrad Hotel sa Ocean Drive, Mall of Asia (MOA) ng naturang lungsod.

Nag-iinspeksiyon ang isa pang guwardiya na si Michael Angelo Jacinto sa naturang gusali, nang mapansin niya ang sapatos ng biktima sa ibaba, kaya’t agad niyang tinawagan  sa radyo ngunit hindi sumasagot.

Kasama ang isa pang guwardiya, hinanap nila ang biktima at dito tumambad ang wala nang buhay na si Rivera na basag ang bungo.

Napag-alaman, nadulas ang biktima mula sa ikapitong palapag at nahulog sa ikatlong palapag.

Jaja Garcia