Stupiiiiddd

SABI nga ni Napolean Bonaparte, isang French military at political leader… “In politics, stupidity is not a handicap.”

Ito ang mga katagang maaaring iangkop kay Rep. Amado Bagatsing sa kanyang panukalang ipihit na lang ang monumento ni Dr. Jose Rizal na nasa Luneta Park at iharap sa Lungsod ng Maynila na halos katapat ng Torre De Manila.

Sa dinami-dami naman nang maibibigay na suhestiyon, kung bakit ang monumento pa ni Rizal ang pinagdiskitahang galawin nitong si Bagatsing?  At ang masakit pa,  buong bangis na inihalintulad si Rizal sa estatwa ng kalabaw na malapit sa Grand Stand.  Mabuti pa raw ang kalabaw, nakaharap sa Maynila samantalang si Rizal, nakaharap sa Manila Bay.

Dito makikita kung anong klaseng pag-iisip meron ang isang politikong tulad ni Bagatsing. Sa halip na sumentro sa usapan ng Torre De Manila bilang isang Pambansang Photobomber, nabaling ang isyu sa kung saan dapat nakaharap ang monumento ni Rizal, at pati ang nananahimik na kalabaw ay idinamay.

Tama talaga si Bonaparte na hindi nga sagabal ang pagiging tanga sa politika.  Hindi tayo magtataka kung isang araw, maisipan naman ni Bagatsing na para matapos na ang debate sa pinag-uusapang Torre De Manila, e, pahigain na lang ito para hindi na makasagabal sa monumento ng ating pambansang bayani.