Impraestruktura, agrikultura pininsala ni Egay

NAG-IWAN ng milyon-milyong pinsala sa impraestruktura at agrikultura ang bagyong Egay nang manalasa sa bansa.

Sa press conference ng National Disaster Risk Reduction and Management Council (NDRRMC) nitong Martes ng umaga, sinabi ni spokesperson Mina Marasigan, may napinsalang mga bahay sa Ilocos Norte, Ilocos Sur, La Union, Palawan at Benguet.

Sa nabanggit na mga lugar aniya, apat na bahay ang tuluyang nawasak habang 91 ang bahagyang napinsala.

Sa impraestraktura, batay sa ulat ng Public Works and Highways, umabot sa P4,250,000 ang pinsala sa mga daan sa Cordillera Region bunsod nang pagguho ng lupa at pagbaha.

Mahigit P500,000 ang pinsala sa palaisdaan dahil sa bagyo habang may naitala ring halos P1.3 milyon sa mga palayan sa La Union.

Martes ng umaga nang lumabas ng Philippine area of responsibility (PAR) ang Bagyong Egay.