Forensic probe sa Kentex tapos na — PNP (74 opisyal na bilang ng biktima)

IKINOKONSIDERA ng pamunuan ng PNP Crime Laboratory na tapos na ang kanilang trabaho sa pagsasagawa ng forensic investigation kaugnay ng naganap na Kentex fire tragedy sa Valenzuela City.

Ito’y makaraan ma-identify ng PNP Crime Lab ang huling dalawang naging biktima sa naganap na sunog noong Mayo.

Kinilala ang dalawang biktima na sina Jony Ang Discallar, isang lalaki, natagpuan ng PNP Crime Lab noong Hunyo 19, at Marvi Alvarez Marcelino, isang babae, natagpuan noong Hunyo 21 nang bumalik sa crime scene ang grupo.

Sinabi ni PNP crime laboratory deputy director, Senior Supt. Emmanuel Aranas, ngayon ay nasa 74 na ang naitala nila sa mga namatay sa Kentex fire at tugma na ito sa bilang ng mga nakalistang claimants.

Sa 74 na naging biktima ng sunog, 70 ang nakilala sa pamamagitan ng pagsasagawa ng DNA testing, habang ang tatlo ay physically identified, ang isa pang biktima ay hindi na talaga makilala dahil sunog na ang buong katawan kaya tinawag na lamang nila itong si “victim #35.”

Sinabi ni Aranas, ginawa nila ang lahat ng paraan para malaman ang identity ni victim #35 ngunit wala talaga silang makuhang kahit anong parte o bahagi ng katawan nito na maaaring isailalim sa DNA test.

Maging ang kasarian ni victim #35 ay hindi rin nila madetermina dahil sa halos abo na lamang nang kanilang makuha mula sa nasunog na pabrika.