Aussie natagpuang patay sa hotel

HINIHINALANG inatake sa puso ang isang 48-anyos Australian national makaraan matagpuang walang buhay sa loob ng isang hotel sa Maynila kahapon.

Nakaharang sa pintuan nang matagpuan ni Alvin Dela Pena, 34, room boy, ang biktimang si Jason Pericles Fahibusch, ng 23 Melford St., Hurlston, Sydney

Sa imbestigasyon ni SPO2 Jonathan Bautista ng Manila Police District Homicide Section, dakong 7:05 a.m. nang matagpuan ang bangkay ng biktima sa room 306 ng Hotel 99 sa Bautista St., kanto ng Hidalgo St., Quiapo Maynila.

Nabatid, nagcheck-in ang biktima dakong 11:05 p.m. kamakalawa at nagbilin sa room boy na gisingin siya ng 7 a.m. kinabukasan para makapag-check-out dakong 8 a.m.

Ngunit dakong 7:05 a.m. nang katukin ng room boy ang kuwarto ay hindi sumasagot ang biktima.

Bunsod nito, sapilitang binuksan ang kwarto at natagpuan ang walang buhay na biktima habang nakaharang sa pintuan.

Walang nakitang sugat sa katawan ng biktima kaya pinaniniwalang namatay siya sa atake sa puso.

Leonard Basilio, may kasamang ulat nina Angelica Ballesteros, Anne Marielle Eugenio at Beatriz Pereña