Sarah, ‘di itinanggi ang pagka-gusto kay Piolo

AMBETIOUSLY – Ambet Nabus. /

KAHIT paano naman pala ay naaaliw tayo kay Sarah Geronimo na kahit umober na sa sinasabing edad para ma-involve romantically at iba pa, ay napanindigan ngang “buo” ang values.

No wonder, marami ang naiinggit sa aktres-singer na kahit na-involve sa mga lalaki ay naroon pa rin ang maganda at malinis na imahe nito.

Napakanatural kasi ni Sarah na kahit ang pagkakagusto nito kay papa Piolo Pascual ay hindi itinatanggi, pero alam mong pagtatangi lang at hindi kalandian hahaha! Tapos na ang promo ng movie nila, pero halata mo pa rin ditong kilig na kilig ito sa aktor.

Kasalukuyang humahataw sa takilya (read: P15-M ang naitalang first day gross) ang The BreakUp Playlist movie nila ni Papa Piolo, pagpapatunay ng magandang following sa kanila.

Graded A pa ng CEB ang movie kaya’t hindi makukuwestiyon ang ganda nito.

Nakatakdang i-tour ang movie sa iba’t ibang sinehan worldwide at naghihintay na nga ang mga kababayan natin sa ibang bansa na kiligin din sila at pasayahin ng mga bida ng The BreakUp Playlist.