Pekeng bigas babantayan

DAGUPAN CITY – Tututukan na rin ng Samahang Industriya ng Agrikultura (SINAG) ang napaulat na synthetic rice o pekeng bigas sa lungsod ng Davao.

Ayon kay SINAG chairman Rosendo So, nababahala siya na makarating ang nasabing uri ng bigas sa Northern Luzon.

Naniwala si So na posible itong mangyari dahil dati, ang shipment ng mga smuggled na bigas ay ibinababa sa Davao at Cebu area.

May posibilidad na maibabiyahe ito sa Norte lalo na’t ang Bureau of Customs ay hindi mahigpit sa pagsisiyasat ng transhipment.

Una rito, isang ginang sa Davao City ang nagreklamo na ang nabiling pekeng bigas ay nagmistulang foam nang isaing.

Kaaya-aya aniya ang histura ng kanin dahil sa maputi nitong kulay ngunit nang pisilin at pigain ay nagmistulang foam.