DepEd supervisor, 3 paa patay sa trike vs truck sa Samar (6 pa sugatan)

TACLOBAN CITY – Patuloy na pinaghahanap ang driver ng cargo truck (panel) na responsable sa pagbangga sa isang tricycle sa Brgy. 7, Kilometro 1, siyudad ng Catbalogan, kamakalawa na ikinamatay ng apat katao.

Una rito, tumakas ang nasabing driver makaraan ang insidente.

Base sa nakuhang impormasyon sa Catbalogan Police Station, nakatakas ang suspek bago pa man makaresponde ang mga awtoridad.

Kinilala ang suspek na si Gene Tiolo Presbitero, driver ng panel na magde-deliver sana ng manok sa siyudad.

Una nang kinilala ang mga namatay na si Blanca Labro, schools division supervisor ng DepEd Catbalogan City Division, driver ng tricycle na si Joselito Panican, at sina Danilo Nablo, 14, at Daisy Nablo, 17.

Hindi na umabot nang buhay ang mga biktima sa Samar Provincial Hospital.

Napag-alaman, papasok sana ng Catbalogan ang panel nang mawalan ng kontrol ang manibela nito dahilan para mabangga  ang paparating na tricycle na sinasakyan ng mga biktima.

Bukod sa mga namatay, umaabot sa anim na iba pa ang sugatan.