2 patay, 4 sugatan sa killer truck (6 sasakyan inararo)

DALAWA ang patay kabilang ang isang babaeng napugutan, habang apat ang sugatan nang araruhin ng isang truck ang anim sasakyan sa M.L. Quezon Extention, Antipolo City kamakalawa ng gabi.

Kinilala ni Supt. Arthur Masungsong, hepe ng Antipolo City Police, ang namatay na si Luis Francisco Rebola, tricycle driver, habang hindi pa nakikilala ang babaeng pasahero niya na napugutan ng ulo.

Samantala, grabeng nasugatan sa insidente sina Rogelio Sarmiento, 60, vendor, ng Purok-7, Silihan, Angono; Ernesto dela Paz, tricycle driver; Philip Salvador, 33, ng Sitio Ahon, Antipolo, at Dennis Dutullo, 14, ng Angelica St., Robinson Homes, Antipolo.

Agad naaresto makaraan ang insidente ang driver ng truck na si Armando Cano, 35, nakatira sa Mahabang Parang, Angono, Rizal.

Sa imbestigasyon nina PO3 Elvis Mariquina at PO2 Joeniphir Jabagat, dakong 9 p.m. nang ararohin ng truck (RMK-542) ang anim na sasakyan sa M.L. Quezon Ext., sa Brgy. San Roque.

Sinasabing nawalan ng preno ang truck nang pababa na sa lugar.

Unang nahagip ang tricycle (QW-1985) na minamaneho ni Rebola, ang 60-anyos vendor, at kasunod na sinalpok ang tatlong tricycle (VL-2579, PV-4055, NW-2479), Mitsubishi Adventure (VCA-262) na nakaparada, at isang Isuzu pick-up na minamaneho ni Dela Paz.

Nakapiit na ang driver ng killer truck at nakatakdang sampahan ng kasong double homicide at multiple physical injuries and damage to property.

Ed Moreno