Mag-asawa patay sa aksidente sa Butuan

BUTUAN CITY – Patuloy na pinaghahanap ang suspek na nakabangga at nakapatay sa mag-asawang sakay ng kanilang motorsiklo sa Purok 4, Brgy. Sto. Niño, sa Lungsod ng Butuan, kamakalawa.

Kinilala ni PO3 Pedro Tan, imbestigador ng Butuan City Police Station (BCPS)-5, ang mga biktimang sina Jonathan Soliva, 57, Leneth Soliva, 46, parehong residente ng Brgy. San Antonio, bayan ng RTR, probinsya ng Agusan Del Norte.

Base sa inisyal na imbestigasyon, binabaybay ng mga biktima ang national highway sa bayan ng RTR habang patungo sa Butuan ngunit pagsapit nila sa naturang lugar ay bigla na lang nag-overtake ang kasalubong nilang mini-dump truck sanhi ng pagbangga nito sa kanilang sasakyan.

Dahil sa lakas ng impact, nagkabali-bali ang katawan ng dalawa na naging sanhi ng kanilang agarang kamatayan, habang tumakas ang driver ng truck na si Rico Garmosa, ng Brgy. San Antonio, ng parehong bayan.

Ang may-ari ng sasakyan na si Gerardo Cong ang nakipag-ugnayan sa pamilya ng mga biktima na desididong magsasampa ng kaso laban sa suspek.