Desisyon ng NLRC binalewala ng GMA — TAG

DUMULOG sa Kamara ang Talents Association of GMA (TAG) dahil sa ginagawang pagbabalewala ng GMA Inc., sa naging desisyon ng National Labor Relations Commission (NLRC).

Ayon kay TAG leader Christian Cabaluna, binastos ng nasabing kompanya ang ipinalabas na resolution ng NLRC na nagdedeklarang regular employees ang 107 plaintiffs na talent lamang ang status sa kasalukuyan.

Banggit ni Cabaluna, imbes tumalima ang GMA, hindi na pinapasok pa ang staff ng Reporter’s Notebook na mga miyembro ng TAG dahil paso na umano ang kanilang kontrata.“

Paso na raw kasi ang kanilang kontrata, imbes pabalikin sa network ang mga tinanggal nilang TAG members dati, dinagdagan pa ang inalis, e kung tutuusin regular na ang mga ‘yan dahil nanalo nga kami. Lumalabas talaga na walang galang sa labor code ang GMA,” pahayag ni Cabaluna.

Sinabi ni Rep. Emmi De Jesus, naghain na siya ng House Resolution 1893 na humihiling sa Committee on labor and Employment na imbestigahan ang mga reklamo.

Jethro Sinocruz