Pahiya si Chiz

ANG pangarap ni Sen. Chiz  Escudero na maging bise presidente ni Sen. Grace Poe ay mukhang hindi na mangyayari.  Mananatiling senador na lamang si Chiz at maghihintay ng pagkakataon kung kailan tatakbong presidente si Grace.

Sa ngayon, sinisiguro na ng Liberal Party (LP) na si Interior Sec. Mar Roxas ang kanilang magiging standard bearer, at malamang si Grace ang kanilang magiging bise presidente.

Hindi man aminin, halatang atat na atat si Chiz na maging running mate ni Grace.  Alam ni Chiz na kung magiging kandidato siya bilang vice president ni Grace, madali siyang mananalo dahil sa popularidad nito

Pero sa politika, isang malaking kahibangan kung ang kandidato, lalo na kung tatakbo bilang presidente o bise presidente ay walang kinaaanibang partido.  Ito ang kaso nina Grace at Chiz. Wala silang political machinery at malawak na organisasyong magdadala ng kanilang kandidatura.

Alam ni Grace ang ganitong problema. Kaya nga sa mga susunod na araw pinal na magdedesisyon si Grace kung ano ang kanyang tatakbuhin sa halalan kahit na maiwan pa si Chiz.

Si Chiz, marami pa naman pagkakataon para sa kanya. ‘Wag siyang mawawalan ng pag-asa at hanggang 2019 pa naman siyang senador.  Kung tapos na ang kanyang termino sa senado, p’wede pa naman siyang mag-artista.