2 karnaper todas sa parak

PATAY ang dalawang hinihinalang karnaper makaraan makipagbarilan sa mga operatiba ng Quezon City Police District (QCPD) sa Mindanao Avenue, Brgy. Talipapa,Quezon City kahapon ng madaling araw.

Sa ulat ni Supt. Ariel Capocao, hepe ng QCPD Talipapa Police Station 3, kay QCPD director, Chief Supt. Joel Pagdilao, patuloy pa rin kinikilala ang dalawang napatay na mga suspek.

Ayon kay PO2 Reynandy Tagle ng Station 3, dakong 12:20 a.m. nang maganap ang insidente sa underpass sa kanto ng Mindanao Avenue at  Quirino Highway, Brgy.Talipapa, sa lungsod.

Sakay ang mga suspek ng puting Mitsubishi L300 na walang plaka sa harap habang sa likod ay TRD-340.

Sinita ng mga operatiba ng QCPD-Anti Carnapping Unit ang mga suspek sa Mindanao Avenue kanto ng Road 20, Brgy. Bahay Toro, ngunit imbes huminto ay pinaharurot pa ang sasakyan dahilan para habulin sila ng mga operatiba.

Inabutan ang mga suspek sa underpass ng Mindanao Avenue kanto ng Quirino Highway ngunit imbes sumuko ay pinaputukan ang mga pulis dahilan para gumanti ng putok ang mga awtoridad.

Makaraan ang palitan ng putok, tumimbuwang na walang buhay ang mga suspek na tinamaan ng bala sa iba’t ibang bahagi ng katawan.

Almar Danguilan