Lady store supervisor binugbog ng 4 dalagita

DALAWA sa apat dalagita ang nahaharap sa kasong physical injuries makaraan paghahatawin nang matigas na bagay ang isang 26-anyos babaeng store supervisor sa Sampaloc, Maynila kamakalawa ng gabi.

Kinilala ang dalawang naaresto na sina Amor, 17, at Susan, 15, kapwa ng Sulucan St.,  Sampaloc.

Habang ang biktima ay kinilalang si Margie Sorino ng Malong St., Dagupan, Tondo, nasa malubhang kalagayan sa UST Hospital.

Sa imbestigasyon na iniulat kay Supt. Mannan Muarip, station commander ng Manila Police District-Sampaloc Police Station 4, dinala ng isang Alberto Rivas, nakatalagang security guard ng Dodolon Amusement sa Earnshaw St., sa Sampaloc, ang dalawang dalagitang bumugbog sa kanilang store supervisor dakong 7:50 p.m.

Nauna rito, nakatambay ang dalawang dalagita sa tabi ng Dodolon Amusement ngunit dahil bawal na sila sa establisimyento, tumawag ng sekyu ang biktima para itaboy ang mga suspek.

Sandaling umalis ang dalawa ngunit bumalik na may kasamang dalawa pang dalagita at pinagtulungang bugbugin ang biktima.

Dinampot ng nasabing sekyu ang dalawang dalagita at dinala sa University Belt Area (UBA) Police Community Precinct, bago inilipat sa nasabing himpilan ng pulisya.

Leonard Basilio