HATAW! D'yaryo ng Bayan hatawtabloid.com
HATAWAN – Ed de Leon .
EWAN, pero talagang parang naawa naman kami kay Dennis Padilla nang aminin niya roon sa press conference ng The Breakup Playlist ang katotohanan na hanggang ngayon pala ay hindi pa rin iniuurong ng kanyang anak na si Julia Barretto ang iniharap na petisyon sa korte para mapalitan ang apelyido at huwag nang gamitin ang apelyido ng ama.
Hindi naman tumututol si Dennis na gamitin nga ng kanyang anak ang pangalang Julia Barretto bilang isang artista. Ganoon naman kasi ang mga artista, hindi rin gumagamit kung minsan ng kanilang pangalan. Magandang example na rin nga si Dennis na sinundan ang screen name ng tatay niya na Padilla gayung ang tunay nilang apelyido ay Baldivia. Pero iyon namang gustong mangyari ni Julia at ng isa pa niyang anak na huwag na nilang gamitin ang pangalan ng kanilang ama sa lahat ng mga papeles nilang legal, masakit naman iyon para sa isang ama at tinututulan iyon ni Dennis.
Nagkasundo na sila riyan eh. Kung natatandaan ninyo, noong mag-usap sila bago ang debut ni Julia noong nakaraang taon, sinabi pa niyon na iuurong na niya ang kanyang petisyon, pero hindi pala nangyari iyon. Sinabi rin ni Dennis na bihirang-bihira silang makapag-usap ng kanyang anak at kung nagte-text man siya roon, siguro sa 10 text ay minsan lang sasagot.
Ewan kung ano ang talagang dahilan at nagkaganyan ang mga anak niya kay Dennis. May mga bagay silang hindi napagkasunduan ni Marjorie Barretto na ina ng mga batang iyan kaya sila naghiwalay, pero ngayon nga mukhang nadadamay na ang kanilang mga anak sa hiwalayan.
Inaamin naman ni Dennis na talagang may panahong ni hindi siya makapagpadala ng sustento sa kanyang mga anak, dahil wala naman siyang trabaho noon, pero siguro hindi naman sapat na dahilan iyon para itakwil siya ng kanyang mga anak.
