Caddy tigbak sa pulubi

PATAY ang isang 50-anyos golf caddy nang pagsasaksakin makaraan akusahang nagnakaw at minolestiya ang mga babaeng natutulog sa labas ng isang convenience store sa Intramuros, Maynila kamakalawa.

Binawian ng buhay habang dinadala sa Gat Andres Bonifacio Hospital ang biktimang si Orlando Buntilao, stay-in caddy sa Club Intramuros Golf Course sa Bonifacio Drive, Port Area, Manila.

Habang inaalam pa ang pagkakakilanlan ng suspek na mabilis na tumakas makaraan ang pananaksak.

Sa imbestigasyon ni SPO2 Glenzor Vallejo ng Manila Police District Homicide Section, dakong 8:45 p.m. nang maganap ang insidente sa gilid ng Palacio del Gobernador sa Intramuros.

Napag-alaman, patungo sa Mini Stop ang biktima upang bumili ng pagkain nang lapitan ang mga natutulog sa labas ng convenience store na inakala niyang mga kakilala niya.

Ngunit nagising ang suspek na inakalang nagnanakaw at minomolestiya ng biktima ang mga babaeng natutulog.

Bunsod nito, bumunot ng patalim ang suspek, inundayan ng saksak sa iba’t ibang bahagi ng katawan ang biktima saka mabilis na tumakas.

Leonard Basilio, may dagdag na ulat nina Anne Marielle Eugenio, Rhea Fe Pasumbal at Beatriz Pereña