Suspensiyon pa vs Mayor Binay inirekomenda

INIREKOMENDA ng field investigators ng Office of the Ombudsman na suspendehin muli sina Makati Mayor Erwin “Junjun” Binay at 14 pang opisyal ng Makati City Hall.

Kaugnay ito sa paunang ebidensya na sinasabing pinaboran ang contractor na Hilmarc’s Corporation sa pagpapatayo ng Makati Science High School.

Batay sa 26-pahinang dokumento, sinasabing posibleng may dayaan din sa bidding.

Inirerekomenda ang anim buwan suspensyon para sa mga opisyal para hindi makapag-impluwensya sa preliminary investigation.

Kasama sa rekomendasyong maimbestigahan ang ama niyang si Vice President Jejomar Binay na siyang alkalde ng siyudad noong umpisang ipatayo ang eskwelahan.

Gayonman, hindi pa malaman kung inaprubahan na ito ni Ombudsman Conchita Carpio Morales.

Sakaling aprubahan, ito na ang ikalawang beses na sususpendihin sina Mayor Binay at city hall officials sa magkakaibang kaso ng katiwalian.

Una na silang sinuspinde kaugnay sa maanomalyang Makati City Hall parking building ngunit hinarang ito ng temporary restraining order (TRO) ng Court of Appeals (CA) na ngayo’y tinatalakay pa sa Korte Suprema.