Political dynasty nagpabagal sa kaunlaran ng bansa — Alunan

IkinadEsmaya ni dating Department of Interior and Local Government secretary Rafael Alunan III ang kabiguan ng Kongreso na maipasa sa ikalawang pagbasa ang Anti-Dynasty Bill dahil sa paniniwalang higit pang babagal ang pag-unlad ng bansa kung mananatiling walang kumokontrol sa dinastiya ng mga pamilyang politiko.

“Ang dynasty kasi natin ay extension ng ating feudalistic practices. At ang feudalismo ay nag-setback ng ating growth from the past 50 or 60 years from the time that we gained independence,” paliwanag ni Alunan sa panayam ng Bombo Radyo La Union kamakailan.

Naniniwala ang dating DILG Secretary na dapat lamang pahalagahan ng bawat mamamayang Filipino ang demokrasya na matagal din nating ipinaglaban.

“Ang kailangan natin ay pagtibayin ang ating demokrasya at ang unang-unang dapat iwasan natin ay iyong problema ng feudalismo na nagbibigay ng buhay dito sa mga political dynasty,” diin ni Alunan.

Gayonman, ipinaliwa-nag ni Alunan na nagkakaroon lamang ng masamang kulay ang dynasty ng isang political family kung ipinaiiral ang makasariling paghahangad.

“It’s not that all political dynasties are bad. There are some families who are really serving the public. But in general, most political dynasties are there to serve themselves not the public,”  dagdag ni Alunan.    

Noong Hunyo 10, nabigo ang Kamara na isabatas ang Anti-Dynasty Bill dahil sa pagkontra ng mga mambabatas sa naunang panukala na dalawa lamang miyembro ng isang political family ang maaaring umokupa ng posisyon at pagbabawalan nang tumakbo sa lokal o nasyonal na halalalan ang kanilang mga kamag-anak.