Lady drug courier tiklo sa P5-M shabu

ARESTADO ang isang babaeng hinihinalang courier ng droga makaraan makompiskahan ng P5 milyong halaga ng shabu sa buy-bust operation ng mga tauhan ng Philippine Drug Enforcement Agency (PDEA) sa SM Mall of Asia, Pasay City kamakalawa ng gabi.

Kinilala ni PDEA National Capital Region (NCR) Director Erwin Ogario ang suspek na si Mila Samira, 46, tubong Marawi City, at naninirahan sa Baclaran, Parañaque City.

Base sa report, dakong 7 p.m. nang maaresto si Samira sa SM Mall of Asia sa Seaside Blvd., Pasay City.

Napag-alaman, isang babaeng PDEA agent ang nagpanggap na poseur buyer at nang makabili ng shabu na nagkakahalaga ng P1,000 ay agad inaresto ng mga awtoridad ang suspek.

Nauna rito, inginuso ang suspek ng isang binatilyong nadakip kamakailan sa isang fastfood chain sa naturang mall.

Sinampahan na kahapon sa Pasay City Prosecutor’s Office ng kaukulang kaso ang suspek.

Jaja Garcia