Grace inilampaso si Binay

HINDI na nakabibigla ang resulta ng magkasunod na presidential survey na isinagawa kamakailan ng Pulse Asia at Social Weather Station (SWS) nang ungusan ni Sen. Grace Poe si Vice President Jojo Binay.

Hindi maikakaila na malaki ang naging epekto ng Senate investigation sa kontrobersiyal na  Makati City Hall Parking Bulding II kaya lumagapak ang rating ni Binay.

Pero hindi dapat na maging kampante si Grace.  Ngayong nangunguna na siya sa presidential survey, at alam naman ng kanyang mga kalaban na maghahayag din siya ng kanyang kandidatura sa hinaharap, kailangan mag-ingat at maging handa si Grace dahil tiyak na gigibain siya ng kanyang mga makakalaban.

Hindi lang citizenship at residency ang hahalukayin ng kanyang mga kalaban kundi ang iba pang natatagong baho, kung meron man, ang dapat paghandaan ng senadora. Kailangan niya ng grupong sasalag sa lahat ng mga negatibong ipupukol sa kanya.

At dahil sa survey result ng Pulse Asia at SWS, sinabi ni Grace na … “Muli, ako ay mapagkumbabang nagpapasalamat sa tiwalang ipinagkakaloob ng ating mga kababayan.  Kasama po nila akong naghahangad ng isang bansang makapamumuhay ang bawat Pilipino nang may patas na oportunidad at pagkakataong umunlad.  Ang tinig ng ating mga kababayan  ay mahalaga sa akin.”