Lava at lahar ibinabala sa palibot ng Bulusan

LEGAZPI CITY – Nagbabala ang Philippine Institute of Volcanology and Siesmology (Phivolcs) sa mga residente na nasa palibot ng bulkang Bulusan sa Sorsogon, sa posibleng banta ng lava o iba pang volcanic materials na pwedeng bumuhos ano mang oras.

Ang pahayag ay kasunod ng phreatic explosion na naitala nitong linggo.

Ang mga residente partikular sa Brgy. Puting Sapa ang mas pinag-iingat dahil ito mismo ay pasok sa 4km PDZ, na ang mga magsasaka sa lugar ay labas -pasok pa sa danger zone.

Ayon kay resident volcanologist Ed Laguerta, sa kanilang mahigpit na monitoring sa bulkan, wala pang senyales ng magma ngunit nananatili ang paalala ng kagawaran na mag-ingat ang lahat partikular na sa posibleng lahar.

Sa ngayon, wala pang significant na aktibidad na ipinakita ang Mt. Bulusan makaraan ang pagbuga ng abo na normal nang ugali nito at nananahimik muna bago ang muling pagsabog.

60 mag-aaral, guro nakalanghap ng nakalalasong kemikal (Sa Cam Norte)

SINUGOD sa ospital ang 60 estudyante at isang guro ng San Felipe Elementary School sa Basud, Camarines Norte makaraan makalanghap ng nakalalasong kemikal.

Inireklamo ng mga biktima ang pagkahilo, pagsusuka at pagsakit ng tiyan nang makaamoy nang tila gamot o fertilizer.

Sa inisyal na imbestigasyon, walang nakita ang mga pulis na ano mang lalagyan o lugar na posibleng pinagmulan ng masamang amoy.

Isasailalim sa blood chemical analysis ang ilang mga estudyante para matukoy kung anong kemikal ang nalanghap nila.

Patuloy ang imbestigasyon ng mga awtoridad sa insidente.