3 Vietnamese tiklo sa paghuli ng ‘Pusakal’

ARESTADO ang tatlong Vietnamese national makaraan maaktuhang nanghuhuli ng mga pusang-kalye (pusakal) sa tapat ng isang palengke sa Malabon City kamakalawa ng gabi.

Kinilala ni Senior Supt. Severino Abad, hepe ng Malabon City Police, ang mga suspek na sina Vu Tan Trong, 33; Phan Van Duong, 22, at To Van Dat, 28, pansamantalang naninirahan sa 3rd floor ng ECJ Building sa Real corner Arzobispo streets, Intramuros, Maynila.

Batay sa ulat ng pulisya, dakong 10 p.m. kamakalawa nang maaresto ang mga suspek habang isinisilid  sa lalagyan ng bigas ang siyam na pusang hinuli nila sa harap ng Malabon Central Market sa F. Sevilla Boulevard, Brgy. Tañong ng nasabing lungsod. 

Base ito sa reklamo nina Bernardita Sapitula, 59, at Millete Marcelino, kapwa residente ng Saint Jude Townhouse, Brgy. Ibaba ng nabanggit na barangay.

“Hindi naging malinaw kung ano ang pakay nila kung bakit hinuhuli ang mga ligaw na pusa na gumagala sa palengke, bale siyam ang naipon nilang mga pusa bago sila naaresto,” ayon kay Abad.

Paglabag sa R.A. 8485 o Animal Welfare Act ang kasong isinampa laban sa tatlong Vietnamese na agad pinakawalan  ni Malabon City Prosecutors Office duty inquest prosecutor Deborah Marie Tan dahil sa pahayag ng mga complainant na hindi na sila interesadong ituloy ang kaso.

Rommel Sales