Cancer patients isama sa PhilHealth

SANHI ng hirap na kalagayan ng mga pasyente ng kanser sa bansa, kailangan umanong isama sila bilang benepisaryo ng PhilHealth, ayon kay Cancer Coalition convenor Dr. Dario Lapada Jr.

Sa Tapatan sa Aristocrat media forum, ipinaliwaang ni Lapada na sa kasalukuyang kondisyon ng mga may sakit na kanser imposible na para sa kanila na magkaroon ng access sa mahahalagang medical procedure at treatment na made-detect nang maaga ang kanilang karamdaman para mabigyan ng lunas.

“Kapag nasa early stage maaari pang pagalingin ang kanser. Kaya lang, ang problema ay para roon sa may kanser huli na kapag nadiskubre nilang mayroon sila, idiniin ng duktor.

Sinuportahan naman ito ni Garchitorena Medicare Community Hospital director  Dr. Geneve Rivera-Reyes, na nagsabing dahil sa budgetary constraints ay napag-iwanan ang mga pasyente ng kanser sa pagtanggap ng benepisyo mula sa pamahalaan.

“Kapag ineksamin natin ang allocation ng national budget para sa kalusugan dalawang porsyento lang ang nakalaan para sa mga non-communicable disease, kasama ang kanser,” ani Reyes.

Ayon sa oncologist na si Dr. Mary Claire Soliman, nangunguna sa mga kanser na pumapatay sa mga kalalakihang Filipino ang nakaaapekto sa baga, atay at lapay habang sa kababaihan ay kanser sa dibdib, cervix at gayon din ang baga.

Tracy Cabrera