Brgy. off’l namatay sa ‘sarap’

PINANINIWALAANG inatake sa puso ang isang opisyal ng barangay habang nakikipagtalik sa isang hindi nakilalang babae sa loob ng motel sa Marilao, Bulacan kamakalawa.

Ayon sa ulat mula sa Marilao police, hubo’t hubad na nakatihaya sa sahig at wala nang buhay nang matagpuan ng motel attendants ang biktimang si Roman Lucero, 51, miyembro ng Lupon Tagapamayapa ng Brgy. Ibayo sa naturang bayan.

Sa imbestigasyon ni PO3 Ariel Gacutan, dakong 8:45 a.m. nang mag-check-in ang biktima kasama ang isang babae sa Four King’s Hotel sa Saluysoy Road sa nabanggit na barangay.

Ngunit makalipas ang kalahating oras ay namataan ang babae habang tumatakbo palabas ng establisimento.

Bunsod nito, agad tinungo ng motel attendants ang kuwarto ng biktima na nadatnan nilang nakabulagta sa sahig.

Nagsasagawa nang malalimang imbestigas-yon ang pulisya upang mabatid kung may foul play sa pagkamatay ng biktima, at inaalam ang pagkakakilanlan ng babaeng kasama niyang nag-check-in.