65-anyos top-ranking NPA leader arestado sa Bohol

ARESTADO sa pinagsanib na puwersa ng militar at pulisya ang isang top ranking NPA leader sa inilunsad na operasyon kamakalawa ng umaga sa lalawigan ng Bohol.

Kinilala ni AFP Public Affairs Office (PAO) chief, Lt. Col. Harold Cabunoc, ang naarestong mataas na lider ng NPA na si Exuspero Lloren, 65-anyos.

Si Lloren ay naaresto batay sa warrant of arrest na inisyu ni Judge Thelma Bunyi-Medina ng RTC Manila Branch 32 kaugnay sa 15 counts ng murder hinggil sa infamous “Inopacan Massacre” na kabilang sa mga biktima ay pinaniniwalaang mga informant ng militar.

Nabatid na si Lloren ay dating Secretary of Eastern Visayas regional Party Committee (EVRPC).

Samantala, bagamat sangkot sa ilang criminal activities si Lloren, pinasok niya ang mundo ng politika noong 1997, tumakbo siyang punong barangay ng Pagina, Jag-na, Bohol at nanalo.

Sinabi ni Cabunoc, nahaharap din sa kasong estafa sa Office of the Ombudsman Visayas ang naarestong NPA leader.