Juday, positibo, buntis sa ikalawang pagkakataon!

 

POST ni Judy Ann Santos-Agoncillo sa kanyang @officialjuday Instagram account kahapon, “June 10, 2015, 10:24AM—— POSITIVE”

Masayang inanunsiyo rin ito ng asawa ng aktres na si Ryan Agoncillo sa programang Eat Bulaga habang hawak ang litratong kuha sa ultrasound test.

Natupad na ang pangarap ng mag-asawang Juday at Ryan na muli silang bigyan ng isa pang anak bago man lang tumuntong ang aktres sa 40. Ito ang sinabi niya noon sa presscon ng I Do.

Siyam na linggong buntis ang aktres kaya sobrang tuwa ng mag-asawa kasama na ang buong pamilya, mga kaibigan at katrabaho.

Ilang linggo na ring kumakalat na buntis si Budaday pero walang kompirmasyon at kahapon lang ito inamin ng dalawa.

Naisip namin na baka ito na ang dahilan kaya hindi tinanggap ni Juday ang pelikulang Etiquette of Mistresses kasama sina Kris Aquino, Kim Chiu, at Claudine Barretto.

Nagtanong naman kami sa Dreamscape Entertainment kung tuloy pa rin ang taping ng seryeng Someone To Watch Over Me ngayong Hulyo o Agosto na pagsasamahan nina Juday at Richard Yap pero hindi pa kami masagot habang tinitipa ang balitang ito.

Wala ring sagot ang manager ng aktres na si Tito Alfie Lorenzo nang i-text namin kahapon tungkol sa project nito sa Dreamscape Entertainment.

FACT SHEET – Reggee Bonoan