HATAW! D'yaryo ng Bayan hatawtabloid.com
HATAWAN – Ed de Leon
DAHIL na rin sa nature ng aming trabaho, aaminin naming tatlong beses pa lang naming napapanood iyong bagong seryeng Pangako Sa ‘Yo. Pero sa aming panonood nang makailang ulit, kumbinsido kami sa acting na ipinakikita ni Jodi Sta. Maria. Noong araw hindi namin napupuna iyang si Jodi eh. Kahit na roon sa serye niyang Be Careful With My Heart hindi rin naman masasabing todo ang nailalabas niyang acting talents, pero riyan sa Pangako Sa ‘Yo, mukhang mas matindi ang kanyang dating.
Ang paniwala namin, mas napapansin din siya ngayon ng fans sa seryeng iyan. Hindi nga masasabing siya ang talagang bida kagaya ng pinanggalingan niyang serye, dahil may mas malalaking stars na kasama nila sa serye, pero matindi ang kanyang dating dahil sa kanyang role.
Ayaw naming gumawa ng comparison kagaya ng sinasabi ng iba, na ikinukompara siya sa isa pang mahusay na aktres, si Eula Valdez, na gumawa ng role na ginagampanan niya ngayon sa original na teleserye, kasi nga magkaiba naman sila ng panahon.
Natural kailangang mai-adjust na ang role sa takbo ng panahon ngayon. Dahil doon asahan na ninyo na iba ang magiging atake ni Jodi sa kapareho ring role, kasi nagkaroon na rin kahit na kaunting kaibahan ang mga character eh, at iba na ang panahong ito.
Unfair kay Jodi kung lagi na lang siyang ikukompara sa iba, ganoon on her own ay napakagaling naman niyang talaga.
