Kuya Germs, kailangan pa rin ng telebisyon!

HATAWAN – Ed de Leon

FINALLY, nakabalik na rin si Kuya Germs sa kanyang Walang Tulugan. Six months din naman siyang nawala, at marami rin siyang na-miss at naka-miss sa kanya. Pero ang maganda nga lang, noong panahong hindi siya lumalabas sa telebisyon dahil sa nagkasakit siya, at saka sinasabi ng mga tao na kailangan pang lumabas si Kuya Germs, dahil wala namang nakapalit sa kanya talaga.

Siguro kahit na ano pa ang sabihin ng iba na nagawa nila, at makabago na ang telebisyon sa ngayon, may naghahanap pa rin naman ng dating style ni Kuya Germs, na ewan nga kung bakit hindi nila magawa sa ngayon.

Natatandaan namin, noong araw, basta ganitong panahon na, nagsisimula na si Kuya Germs ng celebration ng independence day sa kanyang mga show, at lahat ng kasuotan at mga production number nila ay Filipiniana na ang tema, at hindi basta-basta iyon. Iyong Bayanihan Dance Company, at maging iyong Ramon Obusan Folkloric Group na hindi mo halos makita sa TV nakukuha niya. Hindi naman puro grupo lang ni Bella Dimayuga ang nakikita sa show niya.

Basta buwan ng Mayo, may Santacruzan pa si Kuya Germs sa kanyang show, at lahat halos ng mga malalaking artista ang nakukuha niyang sagala. Kompleto iyon, mayroon pang musiko at saka mga arko para sa mga sagala.

Iyong ganyang panoorin ang nawawala na sa telebisyon ngayon, kaya marami nga ang nagsasabi kailangan pa rin si Kuya Germs sa telebisyon. Sana nga sa kanyang pagbabalik ngayon ay maibalik din niya ang gaya ng dati sa kanyang mga show noong araw, kaso magastos talaga ang mga ganoong produksiyon.