Brgy. secretary nahulog sa trike nakaladkad ng van

TUGUEGARAO CITY, Cagayan – Patay ang isang barangay secretary makaraan mahulog sa sinasakyang tricycle at makaladkad ng pampasaherong van sa Brgy. Estefania sa bayan ng Amulung, Cagayan kamakalawa.

Kinilala ang biktimang si Rowin Baribad, 34, sekretarya ng Brgy. Abolo sa bayang nabanggit, habang ang driver ng van ay kinilalang Richard Villon, 35, may asawa, at residente ng Ugac Norte, Tuguegarao City.

Ayon sa PNP-Amulung, nawalan ng preno ang pampasaherong van habang binabaybay ang kahabaan ng lansangan ng nasabing bayan at nabangga niya ang sinusundang tricycle na minaneho ni Cresencio Bumagat, barangay kagawad ng Calamagui Amulung.

Dahil dito, nahulog ang biktima mula sa kanyang inuupuang extension sa loob ng tricycle at nakaladkad ng van nang halos 80 metro ang layo

Dinala sa pagamutan ang biktima ngunit idineklarang dead on arrival ng mga doktor.