Chanel Morales, tampok sa Wattpad series ng TV5

 

MASAYA si Chanel Morales sa ibinibigay na projects ng TV5. Tampok sina Chanel, Mark Roque at Joshua Ouano sa Wattpad Presents: Secretly In A Relationship With A Gangster na magsisimula nang mapanood mula June 8 to 12 (Monday to Friday), sa ganap na ika-siyam ng gabi.

Ito ay kuwento hinggil sa modern tale of love and trust. Base ito sa popular online novel ni Sujuanjell, na umabot na sa apat at kalahating milyon ang bumasa at nakakuha ng 46,000 Wattpad votes.

Bukod sa Wattpad series na ito, napapanood din si Chanel sa Happy Truck at Tropa Moko Unli Spoof ng Kapatid Network.

Aminado rin si Chanel na kinilig siya nang pag-agawan ng dalawang guwapitong co-star sa Wattpad series nilang ito. “Opo siyempre, exciting ang ganoon na pinag-aagawan ka ng dalawang boys na ang guguwapo pa! Siyempre ay kinikilig talaga ako,” nakatawang esplika niya.

Ipinahayag din ni Chanel na kahit off-camera raw ay may kilig talaga siyang na-feel dahil okay katrabaho sina Mark at Joshua.

“Nagpupunta kasi sila sa dressing room namin kapag script reading na at nagkakatuwaan talaga kami, nagbibiruan,” nakangiting kuwento pa ni Chanel.

Nabanggit pa niyang bukod sa acting, pangarap din ni Chanel na maging isang singer din. “Hindi lang po singing, singing and dancing, iyong performing talaga. Kung puwede naman pong pagsabayin, mas okay iyong ganoon.”

ALAM MO NA! – Nonie V. Nicasio