HATAW! D'yaryo ng Bayan hatawtabloid.com
HATAWAN – Ed de Leon
HINDI maikaila ni Sharon Cuneta na desmayado siya sa nakita niyang mga picture ng anak na si KC Concepcion na halos bra na lang ang suot doon sa recital concert ng isang dance group na siya ang guest. Hindi lang iyon, maski kami ay nagulat sa nakita naming naka-post na mula yata sa kung saang pictorial shoot ni KC na talagang litaw ang cleavage. Nagtatawa nga ang isa naming kaibigan nang masabi naming para siyang hindi anak ni Sharon. Para siyang anak ni Ruffa Mae Quinto.
Hindi namin masisisi ang isang magulang kagaya ni Sharon kung ganoon nga ang kanyang makikita. Normally sa mga ganyang sitwasyon, ang mas apektado talaga ay iyong tatay kaysa nanay, dahil anak na babae iyan eh. Pero sa kaso nga ni Gabby, siguro kaya naman hindi siya masyadong apektado ay dahil anak nga niya si KC pero hindi naman talaga niya nakasama. Tatlong taon pa lang si KC, meaning halos baby pa nang mahiwalay si Sharon kay Gabby, kaya hindi mo masasabing talagang ok ang attachment ng mag-tatay.
Sa kanyang sumunod na posts, sinabi ni Sharon na natutuwa siya at nasisiyahan na kasama niya ang kanyang buong pamilya. Binanggit niya isa-isa ang kanyang mga anak na sina Frankie, Miel, at Miguel. Pero sinabi niyang may isa pang kulang na ang description niya ay “seems to be far away”.
Pero kung iisipin mo, ano nga ba ang pinagmulan talaga niyan?
Ipinadala ni Sharon sa abroad ang kanyang anak para roon mag-aral. Una dahil naniniwala siya na mas mataas ang kalidad ng edukasyon na makukuha ng kanyang anak doon. Isa pa, naniniwala siyang doon mas masasanay ang kanyang anak na mabuhay independently. Marahil ang isa pang dahilan ay inilalayo niya ang anak sa mga intriga, lalo na’t noong mga panahong iyon ay nagsisimula na nga siyang ma-in love na muli ng seryoso. Hindi nga lang niya naisip kung magiging gaano ka-independent ang kanyang anak pagdating ng araw, at kung mag-iiba nga ba ang values niyon.
Iyang pagkadesmaya ni Sharon, na sa totoo lang nararamdaman din namin, ay dahil sa kaibahan nga lang ng values. Siguro kasi mas conservative tayong mga Pinoy. Sa atin iba na basta ganyan. Pero sa mga dayuhan natural lang ang ginagawang iyon ni KC dahil nasa tamang edad na naman siya.
