Mag-iinang Tetay, tuloy pa rin ng Japan kahit sunod-sunod ang paglindol doon

MUKHANG hindi naman kabado si Kris Aquino sa 8.5 magnitude na lindol sa Tokyo, Japan noong Sabado dahil nakatakda silang lumipad papuntang Osaka sa Huwebes, Hunyo 4 kasama sina Joshua at Bimby at ilang personal staff.

Matagal ng nakaplano ang nasabing bakasyon ng mag-iina para sa selebrasyon ng kaarawan ni Josh bukas, Hunyo 3.

Tinext namin si Kris kung itutuloy pa rin nila ang pag-alis dahil nga baka may after shocks pa, maski na magkalayo ang Osaka at Tokyo ay nasa Japan pa rin sila.

“Okay lang, GO na,” ito ang sagot sa amin ng Queen of All Media.

Gustong-gusto ng mag-iinang Kris, Josh, at Bimby ang Japan dahil ikalawang tahanan na raw nila ito dahil sa magandang kultura at magagalang ang mga tao roon bukod pa sa masasarap ang mga pagkain ay enjoy din silang maglakad-lakad dahil sa magandang klima rito.

Samantala, naging busy si Kris nitong weekend niya dahil nasa Dagupan siya noong Linggo bilang parte ng Northern tour nito para sa Kris TV na nag-umpisa noong Biyernes, Mayo 29 at pagdating nila kahapon ay nagpahinga lang at dumiretso sa live episode ng Aquino and Abunda Tonight.

FACT SHEET – Reggee Bonoan