HATAW! D'yaryo ng Bayan hatawtabloid.com
ni Alex Datu
MASAYANG ibinida ni Mark Neumann na natuto siyang magluto nang ipinagkatiwala ang pinakabagong teledrama ng TV5, ang Pinoy adaption ng Koreanovelang Baker King.
Aniya, talagang pinag-aral sila ng pagluluto ng iba’t ibang putahe bago magsimula ang taping para maging kapani-paniwala ang kanilang pagganap bilang panadero.
Bago man nagsimula ang lahat, inamin ng aktor na may alam na siyang luto, ”Pero bago po, rati na akong marunong magluto ng adobong talong. Recipe po ito ng lola ko, masarap po siyang magluto.”
Sa ngayon, marunong na siyang magluto ng sinigang, pasta, casserole, spaghetti.”Nag-e-enjoy ako sa pagluluto pero ngayon hinto muna ako sa pag-aaral dahil busy na ako sa taping ng ‘Baker King’,” medyo panghihinayang na wika ng binata.
Masasabi nating Lady Luck is on Mark’s side dahil ipinagkatiwala sa kanya ang teledrama pero ang balita, ito ang naging ugat ng pagkakaroon nila ni Vin Abrenicang hindi pagkakaunawaan. Sa presscon ng Baker King ay nasabi nitong nananatili pa rin ang pagkakaibigan nila.
Aniya, ” Hindi po, sa amin wala naman po. Nag-usap na kami and Vin was already interviewed. Hindi naman po sa siya nagalit sa akin. Actually, niyakap niya ako at talagang sincere siya nang nagkita kami.”
Naganap ang paghaharap nila ni Vin sa isang unexpected place at siya pa ang nilapitan ng actor. ”Nang lumapit siya, sinabi niya, ‘congrats bro’, love you man. At last natupad ‘yung dream mo pare’,” pahayag nito.
Inamin din ni Mark na walang professional jealousy sa kanilang dalawa ni Vin at kuha na nito ang pag-uugali ng aktor sa loob ng tatlong taong pagkakaibigan nila. ”I looked up on him noon sa ‘Artista Academy’ kasi magaling siya. Feeling ko talaga siya ang mananalo and he won,” pagbabalik-tanaw nito.
Mark at Shaira, may special friendship na relasyon
Natanong din si Mark tungkol sa sweetness nila ni Shaira Mae, ang leading lady niya sa Baker King. Inamin nitong pinakamalapit sa kanya si Shaira Mae. May ilang show na rin kasi pinagsamahan kaya hindi nakapagtataka na mahulog ang damdamin nila sa isa’t isa.
Aniya, ”Masaya ako kapag kasama ko siya. Komportable ako basta may something, something. We have a special friendship relationship. Alam mo basta, I need someone to talk to like problems, I can tell it to her and she can tell me also her problems.”
Natanong din kung darating ba ang kanilang sweetness sa pagiging mag-on kahit alam ng lahat na taken na ang kanyang leading lady. ”Mayroon na siya eh,” agad nitong sambit. ”Pero kung mag-break sila, why not!” walang kagatol-gatol nitong tsika.
Napapanood na ang Baker King mula Lunes-Biyernes, 9:30 p.m. sa TV5.
