Pangako Sa ‘Yo, inabangan ni Kristine!

“Hi Kath! Congrats. Galingan niyo.

Magpakabait ka and be wise. Okay?” ito ang mensahe ni Kristine Hermosa na orihinal na Yna Macaspac sa seryeng Pangako Sa ‘Yo na umere taong 2000.

Halatang inabangan din ito ni Kristine para mapanood ang bersiyon nina Daniel Padilla at Kathryn Bernardo at marahil para gunitain din ang sarili ng mga panahong ginawa nila ni Jericho Rosales ang nasabing serye.

Ano kaya ang ibig sabihin ng sinabi ni Tin na, “magpakabait ka and be wise?” Hmm, parang may alam ako Ateng Maricris, ha, ha ha.

Samantala, inabangan talaga ng mga tagasubaybay ng Pangako Sa ‘Yo ang unang episode nito noong Lunes maging ang TFC subscribers na kakilala namin ay hinintay din ito at tanong nga ng tanong sa amin ang kakilala namin sa ibang bansa kung anong nangyari, tapos biglang sasabihing, “ay ‘wag mo ng ikuwento para may surprise.”

Back story muna nina Ian Veneracion bilang si Eduardo Buenavista at Jodie Sta. Maria bilang si Amor Powers ang ipinakita kung paano mabubuo ang kanilang pagmamahalan.

Tuwang-tuwa kami sa eksenang kinakausap ni Jodie ang mga larawan ni Ian na nakadikit sa aparador at kunwa’y humihingi ng halik na sinasagot ng, “kiss na naman? Hindi ba nag-kiss na tayo kagabi?” at biglang lilingon ang aktres sa litrato ng kanyang ina (Amy Austria) at sabay sabing, “nagagalit ka na naman ‘nay.”

Ang kaibigang si Erika Padilla na Betty Mae ang karakter ang tagahatid ng balita kay Jodie kung ano ang reaksiyon ni Ian ng matikman ang luto nito sa handaan.

Nakatituwa ang eksenang sinusumpong ng hika si Jodie kasi nga claustrophobic siya nang ma-stock sila sa elevator at nanginginig na umiiyak habang kinakanta ang tong, tong, pakitong-kitong, alimango sa dagat at napansin siya ni Ian at inalalayan nito hanggang sa makalabas sila.

Pinutol ang kuwento sa eksenang pinuntahan ni Jodie si Ian sa opisina niya para sabihin ang nangyari sa minahan na pinagtatrabahuhan ng tatay nitong si Boboy Garovillo bilang si Mr. de Jesus.

Natiyempong mainit ang ulo ni Ian at narinig ni Jodie ang sinabi niya kaya nagulat ang dalaga.

Curious kami kung ano ang ratings ng Pangako Sa ‘Yo noong Lunes habang tinitipa kasi namin ang kolum namin ay wala pa kaming nakuha.

ni Reggee Bonoan