Problemado nagkoryente sa sarili, patay

NAGPAKAMATAY ang isang hindi nakilalang lalaki sa pamamagitan ng pagkoryente sa kanyang sarili sa itaas ng isang gusali dahil sa matinding problema kamakalawa ng gabi sa Pasay City.

Agad binawian ng buhay ang biktimang 40-45-anyos, may taas na 5’2 hanggang 5’4, at nakasuot ng maong pants.

Sa imbestigasyon ni SPO1 Giovanni Arcinue, ng Station Investigation Detective Management Branch (SIDMB) ng Pasay City Police, naganap ang insidente dakong 8:45 p.m. sa Gil Puyat Avenue, Brgy-38,  Zone 05, ng naturang lungsod

Nabatid mula kay King Bayot, 25, stay-in ng Car Wash Auto Shop sa 2015 Gil Puyat Avenue, Brgy. 38, Zone 5, ng naturang lungsod, nakita niya ang biktima nang umakyat sa itaas ng gusali  ng MSV Laser Cutting Service (tarpauline and signage shop).

Sinabihan niya na bumaba ngunit sumigaw ang biktima na magpapakamatay siya saka hinawakan ang kawad ng koryente hanggang siya ay mangisay at sumabit sa kable.

Agad itinawag sa Meralco ang insidente na pansamantalang pinatay ang linya  ng  koryente upang maalis ang biktima. Sinabi ng cigarette vendor na si Margie Sanay, 48, bago ang insidente, bumili sa kanya ng sigarilyo ang malungkot na biktima.

Aniya, nang tanungin niya kung bakit malungkot, ang tugon ng biktima ay “Bakit kung may problem ba ako dapat ba maging masaya?”

Jaja Garcia