HATAW! D'yaryo ng Bayan hatawtabloid.com
INAMIN ni Pangulong Benigno Aquino III kahapon na may “secret deal” ang kanyang administrasyon sa Estados Unidos hinggil sa isyu ng West Philippine Sea (WPS).
Sinabi ng Pangulo, hindi pa niya puwedeng isapubliko ang mga detalye nang pakikipagtulungan ng Amerika sa Filipinas sa usapin bilang depensa kontra sa pangangamkam ng China sa pinag-aagawang mga teritoryo sa WPS.
“Iyong, well, part of it, as you know, meron na tayong tulungan doon sa maritime domain awareness. Ngayon, as you also know, hesitant akong mag-reveal ng lahat ng details e. Siguro maski sa basketball hindi pinapakita ng magkabilang coach ‘yung kanilang playbook,” ayon sa Pangulo sa isang ambush interview makaraan bisitahin ang Marikina Elementary School.
Ang pahayag ng Pangulo ay makaraan mapaulat na walong beses na itinaboy ng Chinese Navy ang US surveillance plane P-8A na nasa himpapawid ng South China Sea dahil military alert zone nila ito kaya’t dapat lisanin agad ng mga Amerikano.
Sa kabila ng insidente, paninindigan aniya ng Filipinas ang karapatan sa mga isla sa WPS na sakop ng exclusive economic zone ng bansa.
“We will still fly the routes that we fly based on international law and the various agreements and treaties we have entered into through various decades,” giit niya.
Binalewala rin niya ang pangamba na kokomprontohin ng China ang Filipinas dahil wala pa namang idinedeklarang “air defense identification zone (Adiz)” ang Beijing.
Rose Novenario
