Florista sinabuyan ng asido, natira nilagok ng suspek

BINABANTAYAN ng mga pulis sa Philippine General Hospital (PGH) ang isang 45-anyos lalaki na uminom ng asido makaraan bugbugin at sabuyan sa mukha ang kanyang live-in partner nang tumanggi ang biktima na lagukin ang nasabing kemikal kahapon ng umaga.

Kinilala ni Supt. Mannan C. Muarip, hepe ng Manila Police District Station 4, ang suspek na si Renato Cordova Jr.,  nahaharap sa mga reklamong frustrated murder at paglabag sa Anti-Violence Against Women and their Children Act o Republic Act 9262.

Habang ang biktimang si Wilma Jaldo, 45, flower arranger, residente ng 1597 Gelinos St., Sta. Cruz, Maynila, ay nalapnos ang mukha at posibleng mabulag ang isang mata.

Ayon sa ulat, dakong 6 a.m. nagwawalis ang biktima sa paligid ng No. 23 stall na Jayzell Flower Shop sa Dos Castillas St., Sampaloc, Maynila nang dumating ang galit na suspek na armado ng kutsilyo at may dalang isang plastic bottle na may lamang muriatic acid.

Habang tinututukan ng kutsilyo ang biktima ay pilit na ipinaiinom ng suspek sa ginang ang asido.

Ngunit pumalag ang biktima kaya ibinuhos ng suspek sa kanyang mukha ang kemikal.

Sa pagresponde ng mga barangay tanod, nabatid na ininom ng suspek ang natitirang asido kaya imbes  arestohin ay isinugod siya sa PGH.

Nasa Infant Jesus Hospital ang biktima na nakatakdang isailalim sa operasyon.

Leonard Basilio