Lyca, napagsasabay ang gigs At pag-aaral

 

NAKATUTUWANG malaman na bagamat kabi-kabila na ang gigs at raket ng The Voice Kids grand winner na si Lyca Gairanod, hindi pala nito pinababayaan ang pag-aaral. Pinagsasabay niya ang pag-aaral at pag-raket kumbaga.

Nasa ikatlong baitang na sa kasalukuyan si Lyca.

Kagagaling lang ng Canada si Lyca dahil siya ang special guest sa concert ng dating coach niyang si Sarah Geronimo. O ‘di ba naman, marami nang bansang nalilibot si Lyca dahil sa kanyang talent.

Isang taon matapos tanghaling unang grand winner ng The Voice Kids, umuulan ng biyaya kay Lyca lalo pa’t walang patid ang pagdating ng gigs at guestings sa kanya. Bukod din sa house and lot na napanalunan niya sa The Voice, nakapagpundar na rin siya ng sasakyan para sa kanyang pamilya.

“Marami na akong nakilalang kaibigan at napaganda pa lalo ang buhay namin. Sobrang saya po na nakakatulong sa pamilya. Natupad ang pangarap ko at nagpapasalamat talaga ako kay God na tinulungan Niya ako,” ani Lyca, na nagsimulang maghanapbuhay noon bilang mangangalakal.

Kung ating matatandaan, bukod sa pagkanta, sumabak na rin si Lyca sa acting sa kanyang life story sa MMK, na pinuri ang performance niya kaya naman nagsabi itong gusto uli niyang umarte.

“Gustong gusto ko po talagang um-acting kaso hindi na talaga kaya ng schedule, hindi na masiksik. Pero kahit ano mang ibigay sa akin, tanggap lang ng tanggap,” aniya.

Hindi rin maitago ni Lyca ang excitement na mapanood ang ikalawang season ng The Voice Kids na magsisimula na ngayong Hunyo. Kaya naman sa pag-aabang ng buong bansa sa susunod na grand winner, mayroong payo si Lyca para sa mga nangangarap,”Libre lang naman pong mangarap kaya mangarap na po kayo nang mangarap. Manalo o matalo, congratulations pa rin. Andyan pa rin si Lord.”

Aniya pa, ”Sana magpakabait sila, huwag nilang kalimutan ang pamilya nila lalong lalo na si God. Magdasal palagi bago kumanta. Huwag lalaki ang ulo at magpakabait lagi.”

Abangan ang pagsisimula ng The Voice Kids Season 2 ngayong Hunyo sa ABS-CBN.

ni Maricris Valdez Nicasio