TV executive, animo’y anino ni male personality sa kabubuntot

ni Ronnie Carrasco III

PARANG aninong lagi nang nakabuntot ang isang TV executive (hulaan n’yo na lang kung lalaki o babae) sa isang matagumpay na lalaking personalidad sa kanyang larangan.

Sa isang espesyal na pagtitipon sa harap ng media (hulaan n’yo na rin kung anong grupo ng mga mamamahayag ‘yon), nasa entablado ang nasabing TV boss at ang binubuntutan niyang popular male personality.

Dahil kasi sa tinamong tagumpay muli ng lalaking personalidad na ‘yon ay nakantiyawan siya ng mga taga-media na magpamahagi naman ng kaunting biyaya. To the delight of the media, inanunsiyo ng TV boss on mike na magpapa-raffle raw ang male personality na ‘yon (na may tangan ding mikropono) ng tumataginting na P100,000.

Halatang nagbago ang timpla ng mukha ng male personality, mukhang wala sa budget ang kanyang instant pa-raffle kaya naman pasimple niyang ibunulong sa TV boss na,”One hundred thou? Paano na ‘yung balato ko sa iyo, mababawasan na?”

Pabulong na rinig na rinig naman daw, kaya biglang kambyo ang TV boss, ”May additional na P50,000 ang ipara-raffle ni (pangalan ng male personality)!”