Holdaper utas sa pulis

NAPATAY ang 22-anyos lalaki nang nagrespondeng pulis makaraan holdapin ang isang empleyado kamakalawa ng gabi sa Muntinlupa City.

Hindi na umabot nang buhay sa Ospital ng Muntinlupa sanhi ng tama ng bala sa katawan ang suspek na si Paulo Drio, nakatira sa 2317 Magenta St., Goodwill, Homes 2, Sucat, Parañaque City.

Habang ang biktima ay kinilalang Alex Lagaa, 26, HR officer, at nakatira sa Hatmonica Bldg., Rhapsody Residences, Brgy. Buli, Muntinlupa City.

Ayon sa pulisya, dakong 11:40 p.m. nang maganap ang insidente sa Saucat Intechange, West Service Road, Brgy. Sucat, Muntinlupa City.

Patawid ng kalsada si Lagaa nang bigla siyang tutukan sa leeg ng dalawang suspek na armado ng kutsilyo at icepick sabay deklara ng holdap habang ang pangatlong kasama ng mga salarin na armado rin ng icepick, ay nagsilbing look-out.

Nang kukunin ng mga suspek mula kay Lagaa ang kanyang bag ay tumanggi siya dahilan upang saksakin siya ni Drio ngunit nailagan ng biktima.

Nagkataong nasa lugar si PO2 Herminigildo Gajeto, nakatalaga sa Regional Police Holding Accounting Unit (RPHAU), kaya agad nagresponde.

Makaraan magpakilalang pulis, tinangka ni PO2 Gajeto na pasukuin ang mga suspek ngunit nanlaban si Drio kaya napilitan siyang barilin habang mabilis na tumakas ang iba pang mga salarin.

Isinugod ni PO2 Gajeto sa ospital si Drio ngunit idineklarang dead on arrival.

Manny Alcala