HATAW! D'yaryo ng Bayan hatawtabloid.com
CAMP OLIVAS, Pampanga – Arestado ang isang padre de pamilya makaraan halinhinang gahasain ang tatlong anak na babae, kabilang ang dalawang menor de edad, sa Brgy. Bonganbon, Nueva Ecija.
Kinilala ni OIC Chief Supt Ronald Santos ang suspek na si Mario Tuquero, 51, ginahasa ang tatlo niyang mga anak na sina Dyutay, 14; Bobot, 11; at Marisol, 19, pawang ng nabanggit na lugar.
Base sa imbestigasyon, nagsumbong kaugnay sa insidente si Marisol sa kanyang Ate Mharie na sinadya niya sa Pandi, Bulacan.
Agad dumulog si Mharie sa mga awtoridad at ipinaaresto ang kanilang ama.
Luhaang inilahad ni Marisol ang sinapit sa kamay ng ama at ibinulgar din sa pulisya ang paggahasa ng suspek sa dalawa pa niyang nakababatang kapatid.
Aniya, hindi agad siya nakapagsumbong dahil sa banta ng suspek na sila ay papatayin.
Ikinagulat ito ng kanilang ina at sinabing wala siyang kamalay-malay sa mga nangyari habang siya ay wala sa kanilang bahay.
Nasa kostudiya na ng Women’s and Children’s Protection desk ang mga biktima na isinailalim sa counselling habang nakapiit na ang suspek.
Raul Suscano
