K-12 program idedepensa ng Palasyo sa SC

IDEDEPENSA ng Palasyo sa Korte Suprema ang K to 12 program ng Department of Education (DepEd).

Sinabi Presidential Communications Secretary Sonny Coloma, pinahalagahan sa pagbalangkas ng programa ang kapakanan ng mga mag-aaral at mga guro.

Ayon kay Deputy Presidential Spokespersom Abigail Valte, tungo sa tamang direksyon para sa de-kalidad na edukasyon ang K to 12 program.

Sa ilalim ng K to 12 program, madaragdagan ng dalawang taon ang 4-year secondary level education para magkaroon ng kabuuang anim na taon sa high school.

Nasa Korte Suprema na ang mga petisyong inihain kontra K to 12 program, kabilang na ang mula sa “Suspend K-12 Coalition,” “K to 12 Alliance,” grupo nina National Artist for Literature Bienvenido Lumbera kasama ang Alliance of Concerned Teachers (ACT), Kabataan at Anakpawis partylist, at kay Sen. Sonny Trillanes.

Pangulo ‘di nilinlang sa K-12 Program — Deped

NILINAW ng Department of Education (DepEd ) na hindi nila nililinlang o binibigyan ng maling impormasyon si Pangulong Benigno Aquino III kaugnay sa kahandaan ng gobyerno sa K to 12 program.

Sa kalatas na ipinalabas ng DepEd , walang katotohan ang akusasyon ni Senator Antonio Trillanes IV na nagbibigay sila ng maling impormasyon sa pangulo para tuluyan nang maipatupad ang nasabing programa.

On-track anila ang K to 12 implementation gaya ng pagtatayo ng karagdagang classroom at pagkuha ng mga karagdagang guro na magtuturo.

Tiniyak din ng DepEd na matatag sila sa pagpapatupad ng K to 12 at lahat ng mga galaw ay transparent at accountable.