Parents, teachers solid vs K-12

MATAGUMPAY na inilunsad ng mga guro, magulang, at estudyante ang kanilang kilos protesta sa Liwasang Bonifacio nitong Sabado upang tutulan ang K-12 Program ng pamahalaan.

Ang pagkilos na tinawag na Suspend K-12 Family Day at inorganisa ni Senador Antonio “Sonny” F. Trillanes IV at ng Suspend K to 12 Coalition, ay dinaluhan ng pamilya ng mga guro at empleyado ng iba’t ibang paaralan sa bansa, estudyante, at iba pang direkta at didirektang maaapektohan ng nasabing programa.

Sa mensaheng ibinigay ni Trillanes, inulit niya ang  kanyang panawagan upang suspindihin ang implementasyon ng kontrobersiyal na programa.

“Tayo po ay nananawagan kay Pangulong Aquino at sa ating mga mahistrado sa Korte Suprema na pakinggan ang daing ng taong bayan na ipatigil muna ang pagpapatupad ng K-12 Program dahil sa delubyong idududlot nito.

“Tayo ay nag-ikot sa buong bansa upang tingnan ang kahandaan ng ating mga paaralan. Ngunit ni isa ay wala akong nakitang handa para sa K-12 na ito. Patuloy na magsisiksikan ang mga estudyante; patuloy na tataas ang drop-out rate; ang mga propesor at empleyado sa kolehiyo ay mawawalan ng trabaho,” panawagan ni Trillanes.

Dumalo rin para makiisa sa panawagan at magbigay ng mensahe ng suporta sina Samahang Magdalo President Don Santiago; ACT Partylist Representative Antonio Tinio; at mga kinatawan mula sa hanay ng mga guro at empleyado ng mga pribado at pampublikong paaralan, magulang, estudyante, at unyon-manggagawa.

Sinundan din ang programa ng isang candle lighting ceremony bilang simbolo ng pagkakaisa ng lahat ng dumalo laban sa programa.

Habang papalapit ang tuluyang pagpapatupad ng K-12 Program, tumataas ang bilang ng mga nananawagang grupo na ipatigil ito. Noong Miyerkoles, dumulog na sa Korte Suprema sina Trillanes at mga kinatawan ng Magdalo Party-list upang hilingin ang paglalabas ng TRO o preliminary injunction na magpapahinto sa programa.

“Tayo ay umaasa na lalaki pa ang bilang ng ating mga kababayan na makikiisa sa aming panawagang suspendihin ang programa. Gusto nating umusad at itaas ang kalidad ng edukasyon sa bansa ngunit ‘di natin ito magagawa sa pamamagitan ng pagdaragdag ng dalawang taon sa high school, kung pagbabasehan natin ang tunay na kalagayan ng ating mga paaralan at mga kababayan.  Nawa ay makita ito ng ating Pangulo at ng Korte Suprema,”dagdag ni Trillanes.

K-12 isasangguni ni Trillanes kay PNoy

MISMONG kay Pangulong Benigno “Noynoy” Aquino III na didiretso si Sen. Sonny Trillanes para ipaalam ang mga isyung nakita niya sa K to 12 program.

“Pupuntahan po natin siya. Bilang kaalyado, makakadiretso naman tayo sa ating Pangulo,” banggit ni Trillanes.

Aniya, “hihikayatin ko siya na magtalaga ng ilang tao na mag-iimbestiga nga kung prepared talaga ‘yung DepEd (Department of Education) o hindi.”

Naniniwala ang senador na binibigyan nang maling impormasyon ang Pangulo ng mga opisyal ng DepEd hinggil sa programa.

“Binobola siya ng no’ng mga education official niya kaya tiwala siya. E ako naman, hindi naman ako mapapagod na kakausap sa kanya na magiging magulo ito next year.”

Umaasa pa rin si Trillanes na papaboran ng Korte Suprema ang hirit niyang temporary restraining order (TRO) para hindi muna ipatupad ang programa.

Samantala, nakatutok aniya sa programa ang Senado sa pangunguna ni Sen. Pia Cayetano, para tuloy-tuloy na masigurong maayos ito.

Hirit niya, magkaroon ng sariling ocular inspection ang Senado para masigurong totoo ang ulat ng DepEd na handa na ang bansa sa K to 12.

Muling iginiit ng senador na masama ang epekto ng K to 12 lalo na’t nasa 80,000 teaching at non-teaching staff ang mawawalan ng trabaho at maraming magulang ang hindi na makapagpapaaral ng kanilang mga anak dahil sa dagdag-bayarin sa matrikula.