2016 polls kapos na sa panahon – Bautista

AMINADO si Comelec Chairman Andres Bautista na pinapaspasan nila ang mga trabaho ngayon sa poll body dahil kinakapos na sila sa election preparation.

Ayon kay Bautista, may mga ginagawa silang konsultasyon para matiyak na matutuloy ang halalan kahit naibasura ang Comelec-Smartmatic deal para sa repairs ng PCOS machines.

Sinabi ng opisyal, malaking hamon ang paghawak niya ng tungkulin sa komisyon kaya kailangan niyang magpursige.

“May ibang proseso po tayong inihahanda para sa halalan, pero ito ay may sapat na konsultasyon sa stakeholders,” wika ni Bautista.

Mataas aniya ang kompyansa niya sa kanilang mga tauhan na magagawa ang repair sa mga PCOS sakaling tuluyan nang hindi mapagbibigyan ang nais nilang magkaroon ng hiwalay na kompanyang hahawak ng maintenance ng mga makina.

“Parang TV repair po ‘yan e. Pwede mong ipagawa sa mismong kompanyang gumawa ng TV, pero pwede rin ipagawa sa ibang may kaalaman sa pagre-repair nito,” dagdag ng Comelec chairman.