FEU prof natagpuang patay

NAAAGNAS na ang katawan ng isang 50-anyos professor ng Far Eastern University (FEU) nang matagpuan sa kanyang inuupahang kuwarto kamakalawa ng gabi sa Sampaloc, Maynila.

Ayon sa imbestigasyon ni PO3 Marlon San Pedro, ng Manila Police District-Homicide Section, dakong 10 p.m. nang matagpuang walang buhay ng kanyang mga kapwa professor na sina Hector Perez at Raul Gana, ang biktimang si Reynaldo Concepcion sa inuupahan niyang Room 2-4, 956 Paquita St., Sampaloc, Maynila.

Sa imbestigasyon ng pulisya, huling nakitang buhay si Concepcion nitong Lunes ng hapon ni Adrian Valeriano, kapitbahay ng biktima.

Walang nakitang ano mang sugat sa katawan ng biktima maliban sa impormasyon na dalawang taon na niyang iniinda ang sakit niya sa prostate.

Ayon kina Perez at Gana, tinatawagan nila ang biktima sa cellphone ngunit hindi sumasagot kaya pinuntahan nila sa inuupahang kuwarto.

Nang hindi magbukas ng pinto ay humingi sila ng tulong sa barangay para puwersahang buksan ang silid. Nang mabuksan ang kuwarto ay tumambad sa kanila ang wala nang buhay na biktima.

Dinala ang bangkay ng biktima sa St. Rich Funeral para isailalim sa awtopsiya. (LEONARD BASILIO, may dagdag na ulat sina MARY JOY SAWA-AN, DARWIN MACALLA, at JOSHUA MOYA)