PDEA pinakikilos vs droga sa Puerto Princesa City

NAGPASAKLOLO si Puerto Princesa Mayor Lucilo Bayron sa Philippine Drug Enforcement Agency (PDEA) para sa mabilisang solusyon sa problema sa droga sa lungsod.

Sa isang pahayag, sinabi ni Bayron na sumulat na siya kay PDEA Director General Arturo Cacdac at hiniling na siyasatin ang impormasyon na nagdadawit sa kilalang personalidad sa operasyon ng droga.

Ginawa ni Bayron ang kahilingan para  sa pagsisiyasat matapos lumutang kahapon ang isang babae na nagsabing isa siyang nabilanggong pusher na nagtrabaho sa magkapatid na tinawag sa call sign na “04” (zero four) at “Tiger.”

Sinabi ng babaeng nagpakilalang “Ara” na dalawang taon siyang nagtulak ng ilegal na droga sa Puerto Princesa City sa ilalim ng pagtangkilik nina 04 at tiger na kanyang tinukoy na dating opisyal at kilalang personalidad sa lungsod kasama ang kapatid nito. Isinalaysay ni Ara na dinadala niya ang droga mula Maynila sa Puerto Princesa noong  2001 hanggang 2003 at natigil lamang ito nang nadakip siya ng anti-drug agents at nakulong nang halos limang taon. Idinagdag na ang droga ay ipinadaraan sa isang hotel na pag-aari ni 04. Sa panawagan ni Bayron kay Cacdac, mas mabuting imbestigahan ang impormasyon upang mapatunayan na hindi siya ang sangkot sa operasyon ng droga. (DG)