Modus sa ‘online ticketing’ nabisto ng PNP-ASG sa NAIA

ISANG bagong modus operandi ang nabuko ng mga awtoridad sa pangunahing paliparan ng bansa nang mapuna na limang pasahero sa NAIA terminal 3 ang may airline tickets na hindi nakapangalan sa kanila.

Ayon kay PNP-Aviation Security Group director, C/Supt. Pablo Francisco E. Balagtas, nadiskubre ito ng isang airline supervisor ng PAL Express nang mapansin na nakapangalan sa iisang tao ang mga airline ticket na hawak ng mga pasahero.

Agad inimpormahan ng airline personnel ang PNP aviation police na agad hinarang ang lima sa boarding gate ng nasabing terminal.  

Habang iniimbestigahan, umamin ang lima na binili lamang daw nila sa online ang mga ticket sa murang halaga.

Ayon kay Gen. Balagtas, kasalukuyang nagsasagawa ng kani-kaniyang imbestigasyon ang airport authorities at airline companies para sa pagkakakilanlan ng mga suspek.

Pinaalalahanan ni Balagtas ang publiko na huwag kumagat sa mga indibidwal na nag-aalok sa online ng plane ticket sa murang halaga.

JSY